Актаныш районының Иске Богады авыл җирлегендәге алты авылга бердәнбер Бөек Ватан сугышы ветераны исән. 94 яшьлек Җәүдәт ага Шәемов — Яңа Богады авылында яши. Авылның иң өлкән кешесе дә ул. Шуңа күрә Богадыда Бөек Җиңүнең 75 еллыгы уңаеннан медаль тапшыру тантанасының түрендә утырды. Тулырак киләсе язмада.
Җәүдәт Шәемов 26 елның августында Яңа Богады авылында туа. 7 еллык мәктәпне сугыш башланган 41 елда тәмамлый. Картлар, хатын-кызлар, яшүсмерләр җилкәсенә калган хуҗалык эшләренең барлык авырлык-газапларын кичерә. 42нче елның башында әтиләрен сугышка озаталар. Гаиләдә алты бала әниләре белән торып кала. Ә 43 елда сугышка китү чираты Җәүдәткә дә килеп җитә. 7 ноябрьдә аны Ерак Көнчыгыш фронтына озаталар. 35 укчы дивизиянең 312 нче укчы полкында хәрби күнегүләр узгач, Уссури елгасын кичеп, II Ерак Көнчыгыш фронтында пулеметчы булып япон самурайларына каршы сугышка керә.
«Маньчжуриядә чираттагы сопканы штурмлаганда дошман пулеметчылары өзлексез атты, аны кулга төшерү өчен 15 сәгать сугыш барды. Зур югалтулар аша сопканы алдык. Сопка башында чылбырлап бәйләнгән 80-90 хатын-кызны күреп шаккаттык. Кулларында автоматлар, пулеметлар. Берсе дә исән килеш бирелмәде. Сугышып һәлак булдылар. Безнекеләр аларның милләтен дә, кемлеген дә ачыклый алмады.»
Сугыш кырындагы бәрелешләрдә үлем белән еш очрашырга туры килә авыл егетенә. Бөек Җиңү көнен Харбинда каршылый. Сугышта батырлыклар күрсәткән өчен II дәрәҗә Ватан сугышы ордены, медальләр белән бүләкләнә.
1951 нче елда армия хезмәтен тәмамлагач кына туган авылына кайта. Ярый әле кайтып өлгерә, сугыштан 44 нче елда каты яраланып, контузияләнеп кайткан әтисе нәкъ шул елны вафат була. Җәүдәт абый хисапчылыкка укый, гомер буе хуҗалыкта эшли. Авыл җирлеге башлыгы Илсур Фәттахов, “94 яшьлек Бөек Ватан сугышы ветераны Җәүдәт Шәемов- аяклы хатирә буларак безгә бик кадерле”,- ди.
Хөрмәтле ветеран хатыны, тыл ветераны Әнисә апа Хафизова белән тату гомер итә. Әнисә апа Солтангол авылыныкы. Аның да яшьлеге сугыш чорына туры килгән. Ач-ялангач чакларда иза чигүләр әлегәчә онытылмый. Күпме генә эшләсәләр дә тамаклары туймый тылдагыларның. Икмәге дә, сөте- мае, ите- хуҗалыкта ни генә җитештерелмәсен, барысы да фронтка озатыла.
Хатыны, тыл ветераны Әнисә Хафизова: «Казанга кадәр җәяүләп мал кудык. Әткәебез сугышта һәлак булды. Әнкәй гомер буе әнкәйне көтте. Хәзерге мул тормышта яшәвебезгә сөенеп туя алмыйм,- ди Әнисә апа. Шушы бәхетле тормышның кадерен белсен иде яшьләр».
Өлкәннәрне социаль хезмәткәр Зөһрә Әхмәтова тәрбияли.
Актаныш муниципаль районы мәгълүмат үзәге ярдәмендә әзерләнде.
