Буада 2005 елдан башлап “Торак һәм шәһәр мохите” илкүләм проекты нигезендә барлыгы сигез күпкатлы йорт төзелеп, файдалануга тапшырылган. Әлеге проектка караган биш төрле программа буенча барлыгы 372 гаилә квартиралы булды. Күптән түгел генә шәһәрдә яшәүче тагы ике яшь гаилә үзләренең торакларын яхшырттылар. программа кысаларында алар күп катлы торактан фатир алдылар. Социаль ипотека ярдәмендә укытучылар да тораклы булды. Әлеге программаның отышлы яклары турында безнең киләсе материалда.
Яңа фатирда Раяз Хәлиловка спорт белән шөгыльләнергә дә, дәрес хәзерләргә дә урын җитәрлек.
Гөлнара Хәлиева социаль ипотека программасы буенча торакка чиратка баса. Чит кешегә квартира өчен түләп торганчы, үзебезгә түләрбез, дип фикер йөртә яшь гаилә. 74 кв метрлы 3 бүлмәле фатирда бүген гаилә башлыгы Марсель һәм ике уллары белән гомер итә.
2 миллион 300 мең сум баштарак куркытса да, социаль ипотека программасы нигезендә һәр балага ипотека суммасыннан 200 мең сум акча чигерелә бара. “Ана капиталы”н да торак өчен файдаланырга булалар.
Гөлнара Мөстәкыймова да Совет урамында төзелгән күрше йорттан тораклы була. һөнәре буенча укытучы булган яшь гаиләгә ипотека ярдәмгә килә.
Гөлнара Мөстәкыймова: «2009нчы елның июнь аенда без социаль программа буенча килешү төзеп, 2010елда ноябрь аенда фатир ачкычларын алдык. Бу безнең өчен бик тә отышлы программа булып чыкты. Дәүләт ярдәм иткәч, сумма кимеде. Хәзер күпкә җиңелрәк.»
Республика Дәүләт торак фондының Буадагы вәкиллеге баш белгече Дилә Әлләмова белдерүенчә, бүгенге көндә “Торак һәм шәһәр мохите” илкүләм проекты буенча программалар нигезендә районда унлап гаилә торакка чират көтә.
Дәүләт торак фондының Буадагы вәкиллеге баш белгече Дилә Әлләмова: «Әлеге программа 2005нче елдан бирле гамәлдә. Бүгенге көнгәәлеге программа кысаларында шәһәрдә 374 фатирлы 8 йорт төзелде.»
Киләчәктә шәһәрнең Төзүчеләр тыкрыгында 60 квартиралы йорт төзү планда каралган.
Ранис Әхмәтшин,Айрат Насруллов.