Республиканың Журналистлар берлегендә Бөек Ватан сугышының бар ачысын татыган ветеран, танылган журналист Александр Маловның “Сугыш турында, Сугышта, Сугышсыз” дип исемләнгән яңа китабын тәкъдим итү булды. Тулырак мәгълүмат Мөршидә Җиһан репортажында.
Әлеге китапта совет солдатының сугыш еллары һәм батырлыклары, Советлар Союзының сугыштан соңгы тормышы, хәзерге Россия һәм Татарстан Республикасының аякка басуы еллары тасвирлана.
Бөек Ватан сугышы Музей-мемориалы мөдире Михаил Черепанов: » Бу китаплар бик кирәк. Чөнки аларны үзе сугышта катнашып, сугышны үз күзләре белән күргән кеше язган. Аны укучы ышанып укый.»
Журналистика һәм санлы коммуникацияләр югары мәктәбе студентлары өчен бу очрашу остаханә сыман да кабул ителде, чөнки Бөек Ватан сугышы ветераны Александр Малов үзе дә журналистика факультетын тәмамлаган.
КФУ студенты Екатерина Черкесова: «Дөресен генә әйткәндә сугыш турында китап укырга да , кино карага да яратмыйм. Ләкин бүген тәкъдим ителгән китап зур кызыксыну уятты, мин аны һичшисез укып чыгачакмын. Александр Малов бик күп күргән, кичергән, аның сөйләгәннәре бик тәэсирле. Ул фронтта катнашкан журналист. Минем өчен бик кызыклы очрашу булды.»
Александр Михайлович фронтка 1943 елда китә. Украина, Польша, Германия, Чехословакияне азат итү өчен көрәшләрдә катнаша. 1 дәрәҗә Ватан сугышы, lll дәрәҗә Дан орденнары, «Батырлык», «Берлинны алган өчен», «Праганы азат иткән өчен» медальләре һәм башка хөкүмәт бүләкләре белән бүләкләнгән.
Бөек Ватан сугышы ветераны Александр Маловның моңа кадәр дә әллә китаплар язганы бар. «Сугыш турында, Сугышта, Сугышсыз» китабы — унынчысы. Әлеге чара Татарстан журналистлар бергеле тарафыннан оештырылды.
Мөршидә Җиһан, Таһир Хәсәнов.
