Тайгак бозда –киез итекләр белән. Казанда “Динамо” ветераннар клубы белән журналистлар җыелма командасы туплы хоккей уенында очрашты. Киез итекләр киеп уйнадылар. “Ракета” стадионында узган уен мавыктыргыч булды. Тулырак киләсе репортажда.
Бу очракта киез итекләр матурлык өчен түгел, ә спорт формасының бер өлешен тәшкил итте. Урамда язгы һава торышы булса да, киез итекләр белән хоккей уйнау үзен аклады.
Беренче карашка сәер тоелса да, стадионда кызыклы тамаша үтте. “Ракета” стадионында журналистлар “Динамо” командасы ветераннарына каршы уйнады.
Киез итекләр киеп туплы хоккей уйнау кышкы маҗарадан милли спорт төренә әйләнеп бара. Шундый турнирлар күп кенә шәһәрләрдә уздырыла. Спортчылар кулында алкалы хоккей уйный торган кәшәкә булырга тиеш. Ә бу юлы башкача булды, туплы хоккей өчен классик кәшәкәләр белән уйнадылар.
Туп та зур түгел иде. Диаметры 6 сантиметрдан беразга гына зуррак. Аны телекамера объективына да төшерергә җиңел түгел. Ә капкачылар үз алларына куелган бурычны уңышлы үтәде. Җәүдәт Абдуллин берничә тапкыр тупны тотып калды.
15шәр минутлы ике период уйнадылар. Беренче периодта “Динамо” ветераннары остарак уйнады. Беренче булып исәпне ачтылар. Аларның спаорттагы казанышларын “Динамо-Казань” командасы баш тренеры Ильяс Хандаев та күзәтте.
Дөрес, бу Динамо уенчыларына ярдәм итмәде. Икенче периодта журналистлар көчлерәк булды. Активрак уйнадылар, көндәшләр капкасына тупны да күбрәк керттеләр. Хәлиткеч голны уен бетәргә бер минут кала керттеләр. 8 гә 7 исәбенә зәңгәр формадагы команда җиңде.
Дусларча уенны юбилей даталарына – Бөек Ватан сугышында Җиңүнең 75 һәм ТАССР төзелүнең 100 еллыгына багышладылар. Уеннан соң бергәләп истәлеккә фоторәсемгә төштеләр, ә җиңгән командага кубок тапшырылды.
Вадим Струминский, Сергей Павлухин.
