Татарстанның Яшел Үзән шәһәрендәге 3 гимназиядә яшь буынны тарихыбызга ихтирамлы итеп тәрбияләргә тырышалар. Мәктәп эчендә эшләп килгән музейлар берничә чорны күз алдына китерергә мөмкинлек бирә. Аларны хәбәрчебез Ләлә Зәйнуллина карап кайтты.
Яшел Үзән шәһәренең 3нче гимназиясе “Россиядә ел мәктәбе” бәйгесе лауреаты, “Мәгариф” илкүләм проекты җиңүчесе, “Татарстанның иң яхшы мәктәпләре” конкурсы лауреаты. Гомумән уңышлары санап кына бетерерлек түгел. Биредә балалар өчен 3 телдә аралашу проекты эшләнгән. Мәсәлән мәктәпнең һәрбер каты аерым бер милләт мәйданчыгы. Беренче кат рус, икенчесе – татар, өченчесе инглиз халкы мәдәниятен искәртеп җиһазланган.
Уку йортының горурлыгы “Күренекле татарлар” музее. Музей 10 бүлектән тора. Музейда 180нән артык экспонат бар. Алар арасында: “Тарих”, “Сәясәт”, “Фән”, “Сәнгать”, “Мәдәният”, “Әдәбият”, “Медицина”, “Чит илләрдәге татарлар”, “Якташларыбыз”, “Спорт”. Һәрбер экспозициядә талантлы шәхесләр турында сүз бара.
Музейда урнашкан дөнья картасы янына килеп аңа күз салсак, татарларның бик күп җирләрдә яшәгәнен күрәбез. Картаның уң ягына татар халкының күренекле мәгърифәтчесе Каюм Насыйриның: “Без татарлар, телебез-татар теле, башка телдән бердә ким түгел” дигән сүзләр язылган.
Күренекле кешеләр арасында шушы төбәктән чыккан: Усман Әлмиев, Азат Вергазов, Фаил Шафигуллин, Мәсхут Имашев, Рәшит Сабиров турында бай мәгълүмат бар. Алар белән булган һәрбер очрашуның матур истәлеге итеп, күргәзмәләр оештырылган.
Шулай да балаларны иң кызыксындырганы спорт бүлеге. Биредә танылган гимнастлар, шахматчылар һәм башка спорт осталары турында мәгълүмат табып була.
Иң мөһиме әлеге музейда укучылар үзләре татар, рус, инглиз телендә экскурсия үткәрә. Музей — балаларны һәм өлкәннәрне берләштереп, патриотик тәрбия, укучыларның рухи-әхлакый һәм мәдәни белем бирү үзәгенә әверелгән хәзинә.
Ләлә Зәйнуллина, Таһир Хәсәнов.
