Буа төбәге республикабызга күп кенә танылган шәхесләрне биргән як. Алар тормышыбызның төрле өлкәләрендә биек үрләр яулады. Шундыйларның берсе — Татарстанның атказанган халыкара хезмәт күрсәтү өлкәсе хезмәткәре, «Татар мәдәнияте һәм татар ашлары халыкара ассоциациясе» җитәкчесе Резидә Хөсәенова. ”Пирамида “ мәдәни-күңел ачу залында аның юбилей кичәсе узды. Бәйрәмнән хәбәрчебез репортажы.
Резидә ханымны күбебез телевизордан күреп таный, инде дистә еллар ул телеканал аша аш-су сәхифәсен алып бара. Татар ашлары рецептлар җыентыгының авторы да ул. Газета-журналларда даими рәвештә тел йотарлык рецептларын тәкъдим итә, «тәмле тапшыруларда» катнаша, халыкны тәмле итеп әзерләргә генә чакырып калмый, милли ризыкларыбызга карата хөрмәт һәм мәхәббәт тәрбияләргә дә өйрәтә. Резидә Хөсәенова төрле илләрдә яшәгән кардәшләребезгә милли ризыкларыбызны әзерләү буенча остаханәләрен үткәреп тә хөрмәт казанды. Мәркәзебез Казанда милли ашларыбызны әзерләү буенча бәйге-марафоннар үткәрүе белән татар халык ашлары традицияләрен саклауга, татар мәдәниятен үстерүгә өлеш кертә.
Резидә Кыям кызы Хөсәенова Буа районының Вольный Стан авылында туып‑үскән, җиде балалы гаиләдә алтынчы сабый булып дөньяга килә. Казан кооперация техникумын тәмамлый. Туган ягы Буага кайта, кондитер булып эши.
Кичә бик җылы һәм җанлы оештырылган иде. Резидә ханым үзенең яраткан тамашачылары өчен матур җырларын җәлләмәде. Киңкырлы хезмәте дәүләтебез тарафыннан да билгеләнеп үтте. Кадерле тамашачыларыбыз исеменнән, Резидә Кыям кызы Хөсәеновага алдагы елларда да уңышлар теләп калабыз. Күпкырлы таланты белән озак еллар халкыбызга хезмәт итүен телибез.
