2022 елда Татарстанда барлык балаларны да бакчалар белән тәэмин итү күздә тотыла. Бу Демография илкүләм проекты нәтиҗәсендә мөмкин булачак. Республика мәгариф һәм фән министрының беренче урынбасары Илсур Һадиуллин бу хакта башкалабыздагы “Хыял” исемле яңа балалар бакчасында белдерде.
Биш яшьлек Ания Мостафина логопед дәресләрен калдырмаска тырыша. Бакчада ярты ел уку вакытында күп кенә хәрефләрне, авазларны әйтергә өйрәнгән. Музыка һәм спорт заллары, логопед, психологик бушану кабинеты. “Хыял” исемле балалар бакчасы былтыр Демография проекты буенча ачылды. 440 балага исәпләнгән. 12 төркем ясли яшендәге сабыйлар өчен. Татар, рус, инглиз телләренә өйрәтәләр.
Казандагы 33 балалар бакчасы мөдире Людмила Царькова: » Аутизм, башка төрле авыру билгеләре булган балалар өчен төркемнәр бар. Аларга үз мәгариф программалары булдырылды, ул балалар белән коррекция-төзәтү чараларын оештырырга мөмкинлек бирә.»
Хәзер бакчада өчкә яшькә кадәрле балаларга мәктәпкәчә белем бирү төбәк проекты гамәлгә ашырыла. Узган ел Татарстанда өч яшькә кадәрле 3 меңнән артык бала бакчаларга йөри башлады.
ТР Мәгариф һәм фән Министрының беренче урынбасары Илсур Һадиуллин: «2022 елда өч яшькә кадәрле барлык балаларны бакча белән тулысынча тәэмин итеп бетерергә тиешбез. Казанда, Чаллыда, Әлмәттә, Түбән Камада, Бөгелмәдә балалар өчен шактый урын кирәк әле.»
Быел «Демография» илкүләм проекты буенча Татарстанда ун мең балага бакчаларда урын булырга тиеш. Һәр икенче урын яшь ярымга кадәрле сабыйлар өчен.
Ралина Абрамова, Таһир Хәсәнов.
