Яшь булуларына да кармастан, сугыштан соңгы елларда авыл-шәһәрне төзекләндерүдә катнашалар. ТАССРның 100 еллыгын каршы алырга хәзерләнгән көннәрдә, без Казандагы 1нче номерлы ТЭЦ төзелешендә катнашкан тыл хезмәтчәне белән аралашып кайтырга булдык. Буа районының Иске Суыксу авылында яшәүче Сания Шәрәфетдинова мәктәпнең яшь армиячеләр отряды белән очрашып, әлеге хатирәләр хакында уртаклашты.
Сания апа яшьармиячеләрне бик теләп һәм кунакчыл каршы алды.Очрашуга дип иң матур яулыкларын бәйләгән, медальләрен таккан. 14 яшьлек кызга сугыш чоры авырлыкларын зурлар белән бергә татырга туры килгән. 18 яшендә кызга повестка килә. Сания белән бергә районнан 33 кыз комиссия узарга китә.
Сания Шәрәфетдинова: “1945нче елның 15нче апрелендә повестка белән Буага бардык. Безне Казанга җибәрделәр. Безне сугышка дип озаттылар,ә ул Казан шәһәрендәге 1нче номерлы ТЭЦның 5 котелын эшләтеп җибәрү өчен эшчеләр кирәк булган”
Сания Шәрәфетдинованың әтисе, абыйлары сугышта катнаша. Әмма тыныч тормышны күрә алмыйча,бик яшьли вафат булалар.
Сания Шәрәфетдинова:”Әнәй елый иде,солдат киеме белән бер генә күргән булсам да ,еламаган булыр идем. Ире дә юк, балалар эшләүчеләр түгел. 4 мәртәбә яралана, әмма кире кайтаалмады”.
Өлкән бала буларак барлык авыр хезмәт кыз җилкәсенә төшә. Кияүгә дә сугыштан соң чыга чыгып, ире белән 5 бала тәрбияләп үстерәләр.Гомерен колхоз эшенә багышлый. Бүген тыл ветераны ялгыз гына яши. 95 яшен каршы алырга җыенса да, барлык эшләрне дә үзе башкара.
Гүзәл Хәйбулова: “Бүген әни белән әтиебезнең 12 оныгы һәм 10 оныкчыгы бар. Аларны бик яратып торалар. Без аның янына кунакка килергә яратабыз”.
Бу көнне мәктәп укучылары тыл ветераныннан бик күп яңалыклар белделәр. Яшь армия отряды озын гомерле кешегә сәламәтлек һәм иминлек теләде.
Ранис Әхмәтшин, Айрат Насруллов.
