Яшел Үзәннең Олы Ачасыр авылында урнашкан атаклы мәгърифәтче Каюм Насыйриның архитектура-этнографик музеенда китап бәйрәме узды. Әлеге чара гомере буе халкына фидакарьләрчә хезмәт кылган, милләт мәнфәгатен үзенең яшәү кыйбласы иткән татар галименең 195 еллыгы уңаеннан оештырылды. Бүген музейга туристлар түгел, ә Каюм Насыйриның 195 еллыгына багышланган тантаналы чарага килүчеләр җыелды. Балаларың укуга һәм белем алуга карашларын яхшы якка үзгәртү максатыннан Каюм Насыйри “Әхлак рисаләсе, “Баларга тәгълим бирмәк” дигән хезмәтләрен яза. Әлеге чараны оештырган, Татарстан Милли музее шагыйрә Эльмира Шәрифуллинаны «Каюм коесы» дип исемләнгән китабы өчен Габдулла Тукай премиясенә тәкъдим итәчәк.
Китап бәйрәмендә нәфис сүз осталары Әлфия Хәбибуллина белән Рәшит Сабиров та чыгыш ясады.
Кичә барышында Каюм Насыйриның күпкырлы эшчәнлеге турында искә алынды. Аның тормышы һәм иҗаты белән чит ил галимнәре дә кызыксынуы искәртелде. Тантанага җыелган авыл халкы өчен дә бүләк булды бу чара. Батырыраклар кунаклар каршында чыгыш ясап кат-кат рәхмәтләрен җиткерде.
Мөршидә Җиһан. Илдус Салаватуллин.
