«Лайк Хостел» кунакханәсе ишегендә рус һәм кытай телләрендә язылган игълан пәйда булган. Анда кунакханә җитәкчелеге Кытай Халык Республикасы гражданнарын хостелга урнаштырмауның сәбәбен коронавирус йоктыру куркынычы белән аңлаткан.
Шул ук вакытта, мини-кунакханә җитәкчелеге игъланның ике телдә язылуын да кайгырткан. Рус телендәге текстны тәрҗемә итү өчен Кытай кешесенә биргәннәр.
Хостелда белдерүләренчә, әлегә аларга игъланга бәйле дәгъвалар килмәгән. Шулай ук кунакханәдә тукталырга теләгән Кытай гражданнарыннан да мөрәҗәгатьләр булмаган.
Коронавирус белән килеп чыккан авыру очракларын кисәтү максатында, Роспотребнадзор белгечләре хәлне тотрыклыландырганчы Кытайга барудан вакытлыча баш тартуны, ә башка илләргә барырга планлаштырганда эпидемиологик хәлне ачыклауны сорый. Мөмкин булганча, чит илдә хайваннар һәм диңгез продуктлары сатыла торган базарларга йөрмәскә, термик эшкәртелгән азыкны һәм шешәгә тутырылган суны кулланырга, кулларны ешрак юарга кирәк.
